Imaxe: As egresadas e egresados que participaron na xornada co director da EEI, José Fariña (segundo pola dereita) (Duvi).
40 anos de Organización Industrial
A EEI conmemora as catro décadas da especialidade
A Escola de Enxeñaría Industrial do Campus Vigo Tecnolóxico conmemora este 2025 o 40 aniversario da primeira promoción da especialidade de Organización Industrial. Nestas catro décadas formáronse 2000 profesionais “verdadeiramente polivalentes”, como remarca o catedrático José Carlo Prado. Naquel curso 1984/1985 a especialidade púxose en marcha con seis estudantes. Hoxe son 74 as persoas matriculadas, que superan as 64 prazas ofertadas.
A EEI acolle varios actos para esta efeméride, incluíndo xornadas técnicas que traerán de novo ás aulas a quen foron estudantes da titulación e agora son profesionais con recoñecemento. Prado, director do grupo de Enxeñaría de Organización, subliña que o balance é moi satisfactorio: deuse a coñecer unha profesión que ademais contribuíu e contribúe a mellorar a competitividade de empresas e organizacións. A clave foi “sen dúbida” a “gran materia prima coa que tivemos a sorte de contar ao longo destes anos: persoas traballadoras, innovadoras, ilusionadas…”.
Cinco xornadas técnicas
A primeira das xornadas técnicas acábase de celebrar o 4 de febreiro na sede campus da Escola de Enxeñería Industrial, centrada no perfil polivalente desta profesión. Prado explica que son profesionais que reciben formación en materias básicas, como matemáticas, física ou debuxo; en tecnoloxías, como automática ou mecánica; e tamén en xestión de empresas, como produción, marketing ou finanzas.
Para pór de relevo esta polivalencia invitouse a persoas egresadas que levan a cabo o seu labor en actividades, sectores ou empresas menos habituais ou máis descoñecidas, pero onde a enxeñaría de organización xoga un papel importante. Seguindo esta premisa cóntase coa participación de Mara Sanmartín Carrera, responsable de Loxística no Hospital Ribera Povisa; Olaya Cea Fontela, responsable de Enxeñaría no Grupo Castrosúa; Ignacio Garmilla Mancho, Operations Manager & CSO en Optare Solutions, empresa líder no sector TIC; Millán Otero Dans, People Planning en Inditex; e Ana Mouriz Martínez, responsable de Desenvolvemento Local e Emprego no Concello de Vigo.
Neste, coloquio baixo o título O enxeñeiro de Organización: perfil polivalente, Mara Sanmartín, espectadora hai dez anos durante o 30º aniversario, explicou, agora como profesional e relatora, que querían aproveitar a visita á escola para contar ás novas xeracións as opcións que as persoas egresadas de Enxeñaría de Organización teñen ao alcance da súa man. Olaya Cea, de Castrosúa, subliñou como estudar Enxeñaría de Organización Industrial abre a mente para poder traballar en calquera ámbito, proporciona a capacidade de entender e resolver problemas, e tamén, e non menos importante, de tratar con persoas.
Ignacio Garmilla, de Optare Solutions, centrou a súa alocución en explicar as funcións da dirección de operacións nunha consultora tecnolóxica, ademais de remarcar como estes estudos son un bo punto de partida para traballar en xestión de recursos e persoas, algo co que concordou Millán Otero, de Inditex. Ana Mouriz, pola súa banda, representou o perfil de profesionais que se dedican á función pública.
Próximas citas
A seguinte xornada será no mes de marzo e levará por título Os mozos enxeñeiros de organización. A terceira celebrarase o 16 de setembro e centrarase no papel destes profesionais como emprendedores e ante as novas tecnoloxías; a cuarta, o 21 de outubro, analizará o seu labor nos postos de alta dirección, e a conferencia de clausura está prevista para o 21 de novembro.
“Con estas xornadas queremos agradecerlle ás empresas e ás organizacións, tanto pequenas como medianas e grandes, que apostaron polos nosos enxeñeiros de organización”, recalca Prado.
Máis información
