A final do ASTI Challenge celebrarase en xuño en Burgos. A cita será no Museo da Evolución Humana o vindeiro 6 de xuño.
Acudirán á competición cun robot ao que bautizaron como AdaLove, en honra á matemática Ada Lovelace.
Un equipo de cinco alumnos e unha alumna da Universidade de Vigo, integrantes da rama de estudantes do IEEE, Institute of Electrical and Electronics Engineers, acaba de clasificarse para participar na final do maior desafío de robótica educativa do país, a categoría superior do ASTI Challenge 2020, unha cita na que participaron máis de 120 equipos procedentes de toda España. A final estaba prevista para o pasado sábado 28 de marzo no Museo da Evolución Humana de Burgos, pero, debido á situación excepcional causada polo brote e expansión do Covid-19, decidiu posporse ata o vindeiro 6 de xuño.
Antes de ser seleccionados para a final pasaron por catro fases previas de temáticas variadas nas que o xurado valorou a planificación e a capacidade de orzamentar o proxecto, o deseño do prototipo en todos os seus aspectos e a creación dun algoritmo en Python para a orientación autónoma dun robot en simulación. “Comezamos o deseño inicial de AdaLove o pasado mes de decembro e a partir dese momento tivemos que ir cumprindo as diferentes fases previstas pola organización”, explican os alumnos.
