Está formado por alumnado dos graos de Tecnoloxías de Telecomunicación e Organización Industrial.
O seu proxecto é unha aplicación para asistir a persoas con discapacidade visual en aeroportos.
Por segundo ano consecutivo, o equipo que representa á Universidade de Vigo clasifícase para a final de Vodafone Campus Lab, un programa de formación online onde estudantes de diferentes disciplinas traballan en equipo para crear solucións a retos de innovación. O grupo, formado por alumnado dos graos de enxeñaría en Tecnoloxías de Telecomunicación e Organización Industrial, compite cun proxecto dunha aplicación de móbil para asistir a persoas con discapacidade visual en aeroportos.
Baixo o nome de Somos Opopona, o equipo da Universidade de Vigo está coordinado por Manuel Caeiro, docente e investigador do Departamento de Enxeñaría Telemática. Eles e elas decidiron presentarse a esta iniciativa tendo en conta como, explican, “a experiencia de traballar nun proxecto real, fóra do ámbito académico, non é algo que poidamos experimentar habitualmente”. Así, subliñan desde o equipo, o programa non só lles dá a oportunidade de “medirse cun proxecto real” senón tamén de “lanzar a nosa idea ao mercado coa axuda de Vodafone”.
