Imaxe: Rebeca P. Díaz Redondo, David Pérez Castro, Mateo Blanco Rodríguez, Ana Fernández Vilas e Manuel Fernández Veiga (Duvi)
Primeira experiencia galega de enlace de distribución cuántica de claves
atlanTTic traballa na integración de tecnoloxías cuánticas nas redes de comunicación convencionais
Mellorar a seguridade das comunicacións empregando as propiedades da física cuántica. Niso está a traballar atlanTTic, o Centro de Investigación en Tecnoloxías da Telecomunicación do Campus Vigo Tecnolóxico e integrante da Rede CIGUS. No marco do proxecto QURSA (QUantum-based ReSistant Architectures and Techniques), o persoal investigador do centro vigués acaba de conseguir a primeira canle de distribución cuántica de claves de toda Galicia. Conectaron dous puntos da Universidade de Vigo, a Escola de Enxeñaría de Telecomunicación e o centro de datos da Biblioteca Central, poñendo en marcha un enlace QKD (Quantum Key Distribution, distribución cuántica de claves).
QURSA pretende establecer unha base para modernizar e integrar as tecnoloxías cuánticas nas redes de comunicación convencionais. O equipo do proxecto explica que os sistemas QKD empregados envían sinais cuánticos a través dunha fibra. Mediante un protocolo de medida e comunicación é capaz e distribuír de xeito totalmente seguro esas claves. Emisor e receptor poden usalas para cifrar as súas mensaxes e envialas sen que ninguén as poida descifrar.
O equipo de investigación do proxecto #QURSA consegue establecer o primeiro enlace de distribución cuántica de claves de toda Galicia.
➡️https://t.co/IZ7Ghx1IZ4@uvigo @EETelecoVigo #SomosCIGUS #FEDERGalicia #fisicacuantica #criptografia #QKD #investigaciónGalicia
— atlanTTic – UVigo (@atlanTTic_uvigo) November 18, 2024
Con financiamento do Ministerio de Ciencia
O equipo de investigación de QURSA está formado polos investigadores principais e docentes da Escola de Enxeñaría de Telecomunicación Ana Fernández Vilas e Manuel Fernández Veiga. Complétano a investigadora Rebeca P. Díaz Redondo e os investigadores contratados Mateo Blanco Rodríguez e David Pérez Castro. Durante todo o proceso contaron co apoio dos Servizos Informáticos da Biblioteca Central da UVigo, e especialmente de Miguel Polo.
O proxecto QURSA botou a andar en xaneiro de 2023 financiado polo Programa de Transición Ecolóxica e Dixital do Ministerio de Ciencia, Innovación e Universidades. Coordinado desde a Universidade de Vigo por atlanTTic, desenvólvese en colaboración co Instituto Leonardo Torres Quevedo do CSIC e a Universidade Carlos III de Madrid.
Máis información
