atlanTTic abre o prazo para concorrer ao II premio á mellor tese no ámbito das tecnoloxías de telecomunicación
Está aberto a teses defendidas en calquera universidade española
O Centro de Investigación en Tecnoloxías da Telecomunicación do Campus Vigo Tecnolóxico, atlanTTic, convoca a II edición do seu premio á mellor tese doutoral no ámbito das tecnoloxías de telecomunicación. Esta distinción pretende recoñecer o labor realizado polas persoas investigadoras cuxa investigación supoña un avance salientable no eido das tecnoloxías de telecomunicación. Recoñece achegas que, baseadas na innovación, a orixinalidade, a creatividade e o rigor científico, supoñen un avance no coñecemento producido nesta disciplina. A súa vontade é tamén servir de acicate complementario a todas as persoas que investigan neste ámbito.
O premio, cuxa contía máxima é de 2.500 €, está aberto a persoas de toda nacionalidade que estudasen en calquera universidade española. É necesario estar xa en posesión do título de doutoramento, cunha tese do eido das tecnoloxías de telecomunicación (comunicacións, servizos dixitais e/ou ciberseguridade) no ano 2023. Ademais, é requisito que o traballo acadase a máxima cualificación (excelente cum laude), e tamén ter publicado dous artigos JCR Q1/Q2 ou ben dispor dunha patente en explotación por un resultado da investigación realizada no contexto da tese.
O prazo de candidaturas permanecerá aberto ata o 16 de setembro a través da sede electrónica da UVigo. É necesario descargar e encher o formulario e presentalo a través da opción “instancia xenérica (SXER)” con asunto “premio atlanTTic-Tese Doutoral”.
⚠️ @atlanTTic_uvigo convoca a segunda edición do seu premio á mellor tese de doutoramento no eido das tecnoloxías de telecomunicación. Os traballos poden presentarse ata o próximo luns 16 de setembro.
➡️ https://t.co/33v74Q6PjP#MáisUVigo #UVigo100x100 #SempreUVigo #VivoUVigo pic.twitter.com/9qFPYGfDIN
— Universidade de Vigo (@uvigo) September 11, 2024
Valoración das propostas
A comisión de avaliación considerará os cinco méritos máis significativos de cada traballo, e asignará unha puntuación máxima de 100 puntos. Estes méritos están relacionados coas publicacións de impacto en revistas JCR de gran relevancia, as publicacións de impacto en congresos internacionais e os resultados de transferencia, patentes ou aplicacións comerciais, todos eles no ámbito das tecnoloxías da telecomunicación e indicando claramente a súa participación e relación coa tese. Por último, tamén se valorarán os premios recibidos, os proxectos xerados a partir da tese e outros méritos como estadías no estranxeiro ou o financiamento recibido.
Máis información
