Enxeñería Industrial conmemorará en outubro 50 anos formando profesionais
Tamén se celebran 125 anos da creación da Escola de Artes e Industrias de Vigo
A Escola de Enxeñaría Industrial do Campus Vigo Tecnolóxico ten unha dobre celebración este ano: dunha banda, fanse 50 anos do inicio da actividade docente da Escola Técnica Superior de Enxeñeiros Industriais de Vigo, ETSII. E, ademais, 125 anos da creación da Escola de Artes e Industrias de Vigo, antecedente da Escola Universitaria de Enxeñaría Técnica Industrial, EUITI. Por iso, a escola está a preparar un amplo programa conmemorativo para os vindeiros 20 e 24 de outubro. Reunirá a varias xeracións de profesionais que se formaron no centro, e porá así en valor o papel da formación en enxeñaría industrial no desenvolvemento económico e social de Vigo e de Galicia.
José Fariña, actual director da escola, sinala que pretenden así recoñecer as persoas que contribuíron a construíla, a un tempo que abrir unha reflexión sobre o papel da enxeñaría na industria e na sociedade. Explica que o primeiro día de actividade docente na Escola Técnica Superior de Enxeñeiros Industriais de Vigo, que daquela dependía da Universidade de Santiago de Compostela, foi o 20 de outubro de 1976.
Previamente, o 25 de xaneiro de 1901, fora creada a Escola de Artes e Industrias de Vigo, centro que daría orixe á Escola Universitaria de Enxeñaría Técnica Industrial. En 2011 fusionáronse os dous centros, dando lugar á actual Escola de Enxeñaría Industrial.
Fariña subliña que a celebración vai estar centrada na importancia que ten a escola na contorna produtiva e social de Galicia, ademais de pór en valor a oferta académica e recuperar vínculos coa comunidade de persoas egresadas.
Unha viaxe ao pasado
A primeira xornada de celebración será o martes 20 de outubro entre as 12 e as 14 horas. Estará especialmente dirixida a alumnado, PDI e persoas egresadas. Esta proposta pretende que a escola faga unha viaxe no tempo, recuperando o ambiente das primeiras promocións.
Así, haberá aulas e espazos ambientados nos anos 70, con materiais coma apuntamentos ou fotografías históricas. Seguidamente, haberá unha emisión de radio en directo no vestíbulo, con entrevistas a persoas de distintas promocións e música da época. A xornada rematará cun concurso de vestimenta á moda das diferentes décadas de actividade da escola.
Mesa redonda, relatorio, libro e reencontros
A do sábado 24 de outubro será unha xornada de reencontro das distintas promocións que pasaron polo centro. A apertura será ás 11 h, baixo o fío condutor “Naceu, viviu, o futuro por vir”. A continuación, unha mesa redonda baixo o título “Fixeron escola”, na que profesorado xubilado e representantes do eido empresarial compartirán lembranzas e experiencias e debaterán sobre o futuro da enxeñaría.
Ás 12:05 horas, un alto directivo empresarial ofrecerá o relatorio “Industria, talento e innovación: o papel da enxeñaría no Vigo da próxima década”. E ás 12:30 presentarase o libro do 50º aniversario, elaborado polo Observatorio de Persoas Egresadas. Será o profesor e ex-reitor Luis Espada Recarey, director do observatorio, o responsable de presentar esta publicación que recompila os fitos máis relevantes da historia da escola. Seguidamente farase unha homenaxe ao profesorado e entregaranse exemplares do libro. O colofón virá coa foto de familia e un petisco con zonas sinaladas por décadas para facilitar os reencontros.
Extensa oferta académica
Transcorridas cinco décadas, a actual Escola de Enxeñaría Industrial ten unha importante dimensión académica: conta con 2 765 estudantes, dos que 2 500 cursan grao e 265 máster.
A oferta de grao abrangue unha ducia de titulacións, entre as que se inclúen Enxeñaría da Automoción, Enxeñaría Biomédica, Enxeñaría Eléctrica, Enxeñaría Electrónica Industrial e Automática, Enxeñaría Mecánica, Enxeñaría de Organización Industrial, Enxeñaría Química Industrial e Enxeñaría en Tecnoloxías Industriais, así como diferentes programas de simultaneidade.
No ámbito do posgrao, a escola ofrece 10 másteres universitarios, vinculados a áreas como a enxeñaría industrial, a enxeñaría biomédica, a fabricación aditiva, os vehículos autónomos, a mecatrónica, a automoción, a prevención de riscos laborais, a enerxía e sustentabilidade ou a dirección e innovación da cadea de subministración.
A organización pretende que tanto a xornada do 20 coma, especialmente, a do 24 de outubro sexan unha celebración construída coa participación de todas as persoas que formaron parte do centro. A asistencia a esa segunda xornada será gratuíta, pero con inscrición previa. A escola convida a levar fotografías para incorporar ao muro de lembranzas.
Máis información



