Imaxe: Un grupo de estudantes da EEME nunha viaxe de estudos a unha empresa do sector (Duvi)
O Grao en Enxeñaría da Enerxía, primeiro da UVigo con selo de excelencia
Recoñece a calidade docente e a elevada inserción laboral das persoas egresadas
O Campus Vigo Tecnolóxico obtén un novo recoñecemento á calidade da súa oferta académica: o Grao en Enxeñaría da Enerxía, impartido na Escola de Enxeñaría de Minas e Enerxía, converteuse no primeiro da Universidade de Vigo en obter o selo de excelencia da Xunta de Galicia. Esta distinción recoñece o alto nivel académico, docente e investigador das titulacións do Sistema Universitario de Galicia (SUG), así como a súa capacidade de resposta ás demandas actuais da sociedade.
A concesión desta distinción trae consigo una aportación económica de 360.000 euros para os vindeiros 6 anos (60.000 por anualidade) que se destinan ao impulso de accións de mellora e innovación docente na titulación. A propia Escola de Enxeñaría de Minas e Enerxía (EEME) recibiu tamén recentemente o distintivo de empregabilidade da UVigo o distintivo Gal Ego pola súa promoción da lingua.
Recoñecemento e tamén compromiso
Elena Alonso Prieto, directora da escola, ve a consecución desta nova distinción coma o froito do traballo realizado por toda a comunidade do centro, incluído a profesorado, PTXAS e alumnado xunto á colaboración de persoas egresadas, empresas, entidades e asociacións profesionais. Alonso salienta tamén o valor que ten o selo para dar visibilidade ao papel de persoas tituladas pola escola no actual contexto de transición enerxética, cuxo labor é clave para responder a “un dos retos máis importantes que temos como país”. Supón, ademais, un compromiso por manter os resultados que permitiron a obtención do propio selo e por acadar unha serie de obxectivos específicos a conseguir nos vindeiros anos.
A consecución do selo de excelencia implica tamén novos compromisos. Entre os obxectivos que foron comprometidos, a creación dun Plan de Innovación Docente para a titulación, orientado a reforzar as competencias dixitais, incrementar a formación práctica e aplicada e fomentar a resolución de problemas e casos reais.
Elena Alonso explica que a posta en marcha deste plan implicará unha maior colaboración con persoas egresadas, empresas e entidades do sector enerxético, ademais dun maior fincapé na formación do profesorado e na mellora dos recursos vinculados á docencia.
Un grao e tres mestrados con selo de excelencia na UVigo
Desde a Vicerreitoría de Titulacións e Innovación Educativa, Alfonso Lago valora este logro coma o resultado do bo traballo realizado desde a escola. Salienta que este selo supón un recoñecemento para a titulación en diferentes eidos; desde o deseño do proceso de ensinanza-aprendizaxe ata a internacionalización, os sistemas de avaliación ou a inserción laboral das persoas egresadas.
O Campus Vigo Tecnolóxico conta con outra titulación co selo de excelencia da Xunta de Galicia, o Máster Interuniversitario en Matemática Industrial, coordinado pola Universidade de Santiago de Compostela e no que participan a UVigo, UDC, Universidad Carlos III e Universidad Politécnica de Madrid, con docencia na Escola de Enxeñaría de Telecomunicación. Outros dous másteres impartidos na UVigo contan con el: o Máster Universitario en Tradución para a Comunicación Internacional e o Máster Interuniversitario en Biotecnoloxía Avanzada.
Máis información
