Imaxe: operadores do grupo ATRG na estación de seguimento de satélites na Escola de Enxeñaría de Telecomunicación (Duvi)
O Grupo de Tecnoloxía Aerospacial de atlanTTic (ATRG) participará no seguimento da misión Artemis II
A primeira data dispoñible para o lanzamento desta misión da NASA é o vindeiro 1 de abril
A axencia espacial estadounidense, NASA, confirmaba oficialmente o pasado martes que o 1 de abril será a primeira data dispoñible para o lanzamento desde o Centro Espacial Kennedy, en Florida, de Artemis II, a primeira misión lunar tripulada desde 1972.
Esta misión, que marcará o regreso dunha tripulación humana ás proximidades da Lúa, contará coa participación do Grupo de Tecnoloxía Aeroespacial (ATRG) do centro de investigación atlanTTic do Campus Vigo Tecnolóxico. Será a través da cooperación establecida coa empresa tecnolóxica española Integrasys, seleccionada pola NASA para realizar tarefas de seguimento terrestre da cápsula Orion desta misión. Durante a viaxe, a cápsula emitirá sinais de radio en banda S que poden actuar como un faro ou latexo electrónico. Fernando Aguado Agelet, catedrático da Universidade de Vigo e director de ATRG, explica que este sinal será captado polas antenas da UVigo e de Integrasys.
Xunto á Universidad de Sevilla, Integrasys foi a única firma española seleccionada para liderar a monitoraxe do sinal da nave nesta fase. É unha empresa con sede en Las Rozas (Madrid) especializada en enxeñaría e fabricación de sistemas avanzados para a monitorización, obtención de intelixencia e control do espectro espacial. Conta con delegacións en Estados Unidos e Luxemburgo, entre outros países.
Referencia en enxeñaría aeroespacial a nivel internacional
Persoal experto da UVigo e de Integrasys analizará o sinal da cápsula Orion captado polas antenas da universidade grazas ao principio do efecto Doppler: “do mesmo xeito que o son dunha sirena cambia de ton cando unha ambulancia se achega ou se afasta, a frecuencia do sinal da Orion varía segundo o seu movemento. Ao medir con extrema precisión estes cambios de ton no sinal de radio, os especialistas poderán determinar a posición exacta”, explica Manuel Diz Folgar, investigador do grupo ATRG.
O equipo de operadores da UVigo traballará ininterrompidamente durante os dez días da misión para procesar os datos, un labor de seguimento técnico “vital para asegurar que a nave se mantén na ruta prevista pola NASA durante a súa viaxe de ida e volta”, sinala Fernando Aguado.
A fiabilidade no seguimento terrestre da misión Artemis II é unha prioridade absoluta para a NASA e paso previo a volver pisar a superficie lunar. Integrasys e as universidades de Vigo e Sevilla afrontarán o desafío garantindo unha rede de soporte capaz de monitorear a nave na súa traxectoria de retorno libre arredor da Lúa.
Fernando Aguado considera que participar nesta misión tripulada “valida a excelencia técnica acadada en Galicia”, pois a capacidade de interpretar o efecto Doppler en sinais de banda S para localizar unha nave a miles de quilómetros “sitúa á universidade e á empresa Integrasys no nivel máis alto da enxeñaría aeroespacial internacional”.
Máis información
Cobertura do lanzamento de Artemis II en NASA.gov en español



