Coa novidade de que o alumnado masculino visitará as facultades máis feminizadas, ao tempo que as rapazas continúan achegándose a ámbitos tradicionalmente masculinizados, celébrase este 11 de febreiro a 10ª edición de Elas Fan CienTec, así como outras actividades en escolas, facultades e centros de investigación do campus.
Ao abeiro de Elas Fan CienTec máis de 200 rapazas e rapaces da ESO de catro centros educativos da provincia de Pontevedra visitarán laboratorios e escolas do campus de Vigo para participar en obradoiros científicos organizados por centros como as escolas de enxeñaría do Campus Vigo Tecnolóxico.
O alumnado tamén asistirá a un obradoiro organizado pola Unidade de Igualdade, poderá coñecer a exposición Mulleres investigadoras do Cintecx e participará nunha actividade vinculada ao desenvolvemento do xogo de escapada científico Alerta Verde, que se está a desenvolver coa colaboración da Fundación Española para a Ciencia e a Tecnoloxía (FECYT) – Ministerio de Ciencia, Innovación e Universidades.
Ao marxe de Elas Fan CienTec, a perspectiva de xénero nas tecnoloxías emerxentes será protagonista doutras actividades do 11F, como a mesa redonda que organizará o centro ECOBAS sobre intelixencia artificial e igualdade na Facultade de Ciencias Económicas e que poderá seguirse na canle de YouTube de ECOBAS .
A programación deste 11F complétase cun amplo ciclo de charlas e obradoiros que sesenta investigadoras da UVigo impartirán ao longo do mes, centrados tanto no seu labor investigador coma no papel da muller na ciencia e na tecnoloxía. Estas actividades desenvolveranse en centros educativos, residencias de persoas maiores, aulas hospitalarias, bibliotecas e outros espazos sociais.
Os centros de investigación do Campus Vigo Tecnolóxico participan no proxecto Facendo Plus, que foi subvencionado pola convocatoria Fábrica intelixente e sustentable 2023, cofinanciada pola Unión Europea (IN854A)
